هەولێر... دەستدەکرێت بە دروستكردنى یەکەکانى نیشتەجێبوونى کرێنشینان لە دوو شوێنى زۆر باش

هەولێر...
دەستدەکرێت بە دروستكردنى یەکەکانى نیشتەجێبوونى کرێنشینان لە دوو شوێنى زۆر باش

ئەمرۆ چوارشەممە 2022.12.21 دوابەدواى فەرمانی رێزدار مەسرور بارزانی، سەرۆكی حكومەتی هەرێمی كوردستان، لەبارەى دروستکردنی یەكەی نیشتەجێبوون بۆ كرێنشینان و كەمدەرامەتان، بە سەرپەرشتی ئومێد خۆشناو، پارێزگاری هەولێر و ئامادەبوونى هەریەک لەهێمن قادر و مەسعود کارەش، جێگرانى پارێزگار و یاریدەدەرى پارێزگار و قائیمقامى ناوەند و به‌رێوه‌به‌ری گشتیی وه‌به‌رهێنانی هه‌ولێر و سەرۆکى شارەوانى هەولێر و بەرێوەبەری گشتى شارەوانیەکان و به‌رێوه‌به‌ری نه‌خشه‌دانان و ئاوه‌دانی هه‌ولێر و به‌رێوه‌به‌ری گشتیی رێگاوبانی هه‌ولێر، کۆبوونەوەیەک ئەنجامدرا.

لەسەرەتاى کۆبوونەوەکەدا، دواى پێداچوونەوە بە بڕیار و ڕاسپاردەکانى کۆبوونەوەى پێشوو و دابینکردنى ئەرز و وردەکاری هونەریی و دیزاین و چۆنیەتى دروستکردن و دەستپێکردنى پرۆژەکە لەلایەن سەرۆکایەتى شارەوانى و به‌رێوه‌به‌رایەتی نه‌خشه‌دانان و ئاوه‌دانی هه‌ولێر، پارێزگاری هەولێر، وێڕاى ئەوەى جه‌ختی لە جێبەجێکردنی فەرمان و ڕاسپاردەى سه‌رۆكی حكومه‌تی هه‌رێمی كوردستان كرده‌وه‌ لەبارەى دروستکردنی یەكەکانی نیشتەجێبوون بۆ كرێنشین و كەمدەرامەتان، بڕیاریدا دەست بە دروستکردنى پڕۆژەکە بکرێت لە ڕێگەی باشترین وەبەرهێنەرانی کوردستان، بە باشترین و چاکترین کوالێتى و شێواز، لە دوو شوێنى زۆر باشى شارى هەولێر، کە دەکەوێتە نێوان شەقامى 120مەترى و 150مەترى.

لەتەوەرێکى ترى کۆبوونەوەکەدا، لیژنەیەکى تایبەت پێکهێنرا بۆ دەستکردن بە هەڵاواردن و جیاكردنەوەی ناوى ئەو (59 هەزار) هاوڵاتییەى کە فۆڕمى داواکاری وەرگرتنى یەکەکانیان پڕکردۆتەوە و پاشان دەستبکرێت بە تیروپشکى داواکارییەکان بۆ وەرگرتنى (6 هەزار) یەکەى نیشتەجێبوون، کە دەبێت ئەوناوانەى یەکەکانیان بۆ دەردەچێت 100% شایستەبن و هەموو ئەو مەرجانەى کە دانراون لەسەیان جێبەجێبکرێت و پرۆسەکەش بەشەفافی و دادپەروەرى و دوور لەواستە و واستەکارى بەڕێوەبچێت.

جێگەى باسە، رێزدار مەسرور بارزانی، سەرۆكی حكومەتی هەرێمی كوردستان، لە سەرەتاى مانگى 6ى ئەم ساڵ له‌پێناو نەهێڵانى گرفتى نیشتەجێبوون و خۆشگوزه‌رانی هاوڵاتیانی کرێنشین و هەژار و كه‌مده‌رامه‌تان، بڕیاریدا بە دروستکردنى 20 هەزار یەکەى نیشتەجێبوونى لە سەرتاسەرى هەرێمى کوردستان، کە 6 هەزارى یەکەیان بەر پارێزگاى هەولێر دەکەوێت.