ڕاگەیاندراوێک لە لێژنەی باڵای ئەمنی سەرژمێری
ڕاگەیاندراوێک لە لێژنەی باڵای ئەمنی سەرژمێری
دوای بە سەرکەوتوویی بەڕێوەچوونی پرۆسەی سەرژمێری و پڕکردنەوەی تۆمارکردنی خێزان و دووبارە وردبینی کردن لە رۆژانی ٢٠ و ٢١ی تشرینی دووەمی ٢٠٢٤، هێشتا هەندێ خێزان لە هەرێمی کوردستان و ناوچە کوردستانییەکان و هەندێ شاری عێراق ماون تۆمار بکرێن. بۆ مەبەستی تەواوکردنی پرۆسەکە، ماوەی ٢٤ کاتژمێری دیکە قەدە‌غەی سنوورداری هاتوچۆ تەنها لەنێوان شارەکان درێژ دەکرێتەوە.
لەو ماوەیە داواکاریین ئەو خێزانانەی تۆمار نەکراون لە ماڵەکانیان بمێننەوە و هاوکاری بژمێرەکان بکەن بۆ تەواوکردنی کارەکان. لە ماوەی ئەو ٢٤ کاتژمێرەی داهاتوو، وەکو ٤٨ کاتژمێری ڕابردوو جولەی بازرگانی و کەسابەتی خەڵک و هاتن و چوونی شاندە فەرمیی و حکومییەکان و دامەزراوەکانی حکومەت و بۆنە فەرمییەکان و ئاژانسەکانی نەتەوەیەکگرتووەکان و دیبلۆماتەکان و رۆژنامەنووسان بەدەر دەکرێن و جولە و هاتوچۆیان ئاسایی دەبێت.
سوپاسی بەشداری فراوانی هاووڵاتیان دەکەین و داوا دەکەین ئەوانەی بە هەر هۆکارێک تا ئێستا تۆمار نەکراون، لە ماڵەکانیان بمێننەوە و چاوەڕێی هاتنی بژمێرەکان بکەن بۆ ئەوەی لەو ٢٤ کاتژمێرە، هەموو هاووڵاتیان بە سەرکەوتوویی لە سەرژمێری تۆمار بکرێن.
لێژنەی باڵای ئەمنی سەرپەرشتی سەرژمێری
٢٢ی تشرینی دووەمی ٢٠٢٤