لە ژێرچاودێرى پارێزگارى هەولێر.. لە بەرزاییەکانى کەسنەزان، هەڵمەتێکى پاککردنەوەى شوێنە گەشتیارییەکانى بەڕێوەچوو
لە ژێرچاودێرى پارێزگارى هەولێر..
لە بەرزاییەکانى کەسنەزان، هەڵمەتێکى پاککردنەوەى شوێنە گەشتیارییەکانى بەڕێوەچوو
یەکشەممە 2023.4.30، له پێناو ژینگه‌یه‌کی پاک و بەئامانجى پاراستنى ژینگەى کوردستان و ناوچە گەشتیارییەکان و لە بەردەوامى هەڵمەتە خۆبەخشیەکان، لە ژێرچاودێرى ئومێد خۆشناو، پارێزگارى هەولێر و بەئامادەبوونى بەڕێوەبەرى ئەوقافى هەولێر و سەرۆکى زانکۆى تیشکى نێودەوڵەتى ناحکومى و بەڕێوەبەرى ناحییەى کەسنەزان و بەڕێوەبەرى فەرمانگەى ژینگەپارێزى هەولێر و ژمارەیەکى تر لە مامۆستایانى ئاینى و مامۆستایان و قوتابیانى زانکۆى تیشک و بەرپرسانى دیکەى حزبى و حکومى و چەند رێکخراوێکی ژینگە پارێزى، زانکۆی تیشکی نێودەوڵەتی ناحکومى بە هاوبەشی لەگەڵ بەڕێوەبەرایەتى ژینگە پارێزی و بەڕێوەبەرایەتى ئەوقافى هەولێر، لە بەرزاییەکانى کەسنەزان دەستیانکرد بە هەڵمەتێکى پاککردنەوەى ناوچە گەشتیارییەکان و شوێنەگشتییەکان.
لەوبارەیەشەوە، پارێزگارى هەولێر، وێڕاى دەستخۆشى لە سەرپەرشتیارانى هەوڵمەتەکە و بەشداربووانى، ڕایگەیاند: "هیوادارین خەڵک بەگشتى و گەنجان بەتایبەتى ئەمە ببیینن، کە مامۆستای ئایینی بەو تەمەنەوە دێن و ئەو زبڵە پاکدەکەنەوە و بیریان نه‌چێ، ئەوەی تۆ بە ئاسانی فڕێی دەدەی کارمەندانی ژینگە بەزەحمەت کۆی دەکەنەوە، بۆیە تکایە ژینگەى ناوچە گەشتیارى و شوێنە گشتییەکان بپارێزن". داواشى لە هاوڵاتییان کرد کە دێن بۆ سەردانی شوێنە گەشتیارییەکان، وەک بەرپرسیاریەتیەکى نیشتیمانى بەشێک لە کاتیان ببەخشن و بەشداربن لەو هەڵمەتە و لەمەو دوا هیچ شتێک لە دوای خۆیان فڕێ نەدەن و بەجێى نەهێڵن.
جێگەى باسە، ناوچە گەشتیارەکانى هەرێمى کوردستان بەگشتى و هەولێرى پایتەخت بەتایبەتى لە وەرزى بەهار و نەورۆز ڕۆژانە و هەفتانە ژمارەیەکى زۆرى هاوڵاتیان خێزان ڕوى تێ دەکەن، بەڵام هەندێجار و بەهۆى مامەڵەى نابەرپرسانەى بەشێک لە هاوڵاتیان ژینگەى سروشتى ناوچە گەشتیارییەکان تێکدەدەن، ئەوەش وادەکات ناوچەکان جوانى و پاکیەکى خۆیان لە دەست بدەن.