لە هەولێر.... ڕێورەسمی ناساندنی رێچکەی چیای زاگرۆس بەڕێوەچوو
لە هەولێر....
ڕێورەسمی ناساندنی رێچکەی چیای زاگرۆس بەڕێوەچوو
ئەمشەو یەکشەممە 2025.10.12، بە ئامادەبوونی ئومێد خۆشناو، پارێزگاری هەولێر و ئەمەل جەلال، سەرۆکی دەستەی گەشت و گوزار و ئاریان صلاح الدین، بریکاری وەزارەتی ڕۆشنبیری و یان برێم، کونسوڵی گشتی فەڕەنسا لە هەولێر و ژمارەیەکی تر لە نوێنەرانی ڕێکخراوەکان و مامۆستایانی زانکۆ، لە ڕێورەسمێکدا لەلایەن رێکخراوی رێچکەکانی کوردستان بۆ گەشەپێدان، ناساندنی رێچکەی چیای زاگرۆس بەڕێوەچوو.
لە ڕێورەسمەکەدا، پارێزگاری هەولێر، لە وتارێکدا بەناوی حکومەتی هەرێمی کوردستان و پارێزگای هەولێر، دەستخۆشی لە ڕێکخراوی ناوبراوکرد بۆ ئەنجامدانی ئەوکارە و هیوای سەرکەوتنی بۆ خواستن، هەروەها ئاماژەی بەوەدا کە لە کارەکانیاندا نووسینگەی جەنابی سەرۆکی ئەنجوومەنی وەزیرانی هەرێمی کوردستان هاوکاریان بووە.
هاوکات پشتیوانی و پشتگیر حکومەتی هەرێم و پارێزگای هەولێری بۆ سەرخستنی کارکانیان دووپاتکردەوە و ڕایگەیاند، کە پرۆژە و کارەکەیان بە شێوەیەکی گەورە یارمەتیدەرە لە پەرەسەندن و پێشخستنی کەرتی گەشت و گوزار.
گوتیشی، زنجیرە چیاکانی زاگرۆس و ناوی زاگرۆس لە زاکیرەی مرۆڤی کورد مایەی پێزانیە و چیرۆکی خۆشەویست و نیشانەی مانەوەی گەلی کوردستان و پێکهاتەکانیەتی.
جێگەی باسە، رێچکەی چیای زاگرۆس Zagros Mountain Trail، کە رێگایەکی 215 كیلۆمه‌تریه له هه‌رێمی كوردستان لە گوندی شوش، ئاکرێ ده‌ستپێده‌كات تا ده‌گاته بناری چیای هەڵگورد. بە 36 گوند و پێنج شارۆچکە له‌وانه‌ش ئاکرێ، دینارتە، سۆران، رواندز و چۆمان تێپەڕ دەبێت و درێژترین رێچکەیە لەسەر ئاستی هەرێمی کوردستان و عێراق.
