یانەی هەولێر چاوی بڕیوەتە جامی پاڵەوانیەتەکە

بەر لەگەشت کردنیان بۆ شاری بەغدا بەمەبەستی ئەنجام دانی یاری پێش کۆتایی جامی عێڕاق بەرامبەر یانەی حدود کە بریارە لە رۆژی دووشەممە رێکەوتی 2023/7/31، ئەنجام بدرێ…
بۆ ئەم مەبەستە رۆژی شەممە، هەریەك لە (ئومێد خۆشناو) پارێزگاری هەولێر و ( مەسعود کارەش) جێگری پارێزگار و (نەبەز عەبدولحەمید) قائیمقامی قەزای ناوەندی هەولێر، و عەبدولواحید ئەحمەد سەرۆکی شارەوانی هەولێر، شاندی یانەی وەرزشی هەولێریان بەسەرکردەوە، لە وتەیەکدا پارێزگاری هەولێر وێرای دەستخۆشی کردن لە سەرۆك و دەستەی کارگێری و راهێنەرو یاریزانانی یانەی هەولێر کە لەماوەی رابردوو بە ئیستیحقاقی خۆیان چەندین سەرکەوتنی بەنرخیان بۆ شارەکەیان تۆمار کرد، هاوکات بە راشکاوی بە تیمی یانەی وەرزشی هەولێری راگەیاند: کە ئەمرۆ ئێمە هاتووین بەڵێنی سەرکەوتن لە ئێوە وەربگرین … گرەوی سەرکەوتن بەمانای دڵخۆشکردنی هاندەرانی یانەی هەولێر، کە ئەوان مافی خۆیانە داوای ئەنجامی باش لە یانەی دایك بكەن …
پارێزگاری هەولێر دووپاتیکردەوە بە سەرکەتنی یانەی هەولێر ژمارەی هاندەرانیش وەكو ساڵانی پێشوو زیاتر دەبێت و یاریگا وەكو جاران دەهەژێتەوە ،
پارێزگاری هەولێر ستایشی ستافی راهێنەران و یاریزانانەکانی کرد کە توانیان یانەی هەولێر بگەیەننە ئەم قۆناغە، لە هەمان کاتدا هانی یاریزانەکانیدا لە پێناو سەرکەوتن لەو یارییە و گەیشتن بە یاری کۆتایی جامی عێڕاق بۆ یەکەم جار لە مێژوودا، پاڵپشتی تەواوی حکومەتی هەرێمی کوردستان و پارێزگا و سەرجەم یەکە ئیدارییەکانی شاری هەولێری بۆ دووپات کردنەوە کە هەرچی پێویست بێت لە پێناو سەرکەوتنی یانەکەیان و بەرز راگرتنی ناوی هەولێر ئەنجامی دەدەن….