پارێزگاری هەولێر، لەگەڵ شاندێکی وەزارەتی پلاندانانی فیدراڵ پەرەپێدانی پڕۆژەکانی سندوقی کۆمەڵایەتی لە هەولێر تاوتوێ دەکات
پارێزگاری هەولێر، لەگەڵ شاندێکی وەزارەتی پلاندانانی فیدراڵ پەرەپێدانی پڕۆژەکانی سندوقی کۆمەڵایەتی لە هەولێر تاوتوێ دەکات
ئەمڕۆ پێنجشەممە 2026.10.15، ئومێد خۆشناو، پارێزگاری هەولێر، لە دیوانی پارێزگا، پێشوازی لە موئەید ئیسماعل، بەرێوەبەری گشتیی ئیدارەدانی ستراتیژیەتی كەمكردنەوەی هەژاری لەوەزارەتی پلاندانانی عێراقی فیداراڵی و شاندێكی یاوەری كرد.
دیدارەکە بە مەبەستی تاوتوێکردن و هەڵسەنگاندنی ئەو پڕۆژە خزمەتگوزاری و گەشەپێدانانە ئەنجامدرا کە لە لایەن سندوقی کۆمەڵایەتی بۆ گەشەپێدان لە سنووری پارێزگای هەولێر وەک قۆناغی یەکەم جێبەجێ کراون.
لەدیدارەكەدا، تیشک خرایە سەر گرنگی ئەم پڕۆژانە لەسەر ئاستی گوند و ناوچە کەم دەرامەتەکان، کە ئامانجیان باشترکردنی بژێوی ژیانی هاووڵاتیان، و دابینکردنی خزمەتگوزارییە سەرەتاییەکانی وەک ئاو، کارەبا، ڕێگاوبان، و کەرتی پەروەردە و تەندروستییە.
پارێزگاری هەولێر وێڕای دەربڕینی پاڵپشتی تەواوی ئیدارەی پارێزگاکە بۆ سەرخستنی ئەم جۆرە دەستپێشخەرییانە، ڕایگەیاند کە هەماهەنگی بەردەوام لە نێوان حکومەتی هەرێم و حکومەتی فیدراڵ ڕەنگدانەوەی ئەرێنی لەسەر کوالێتی خزمەتگوزارییەکان دەبێت، بەتایبەت لەو ناوچانەی کە پێویستی زیاتریان بە ئاوڕدانەوە و گەشەپێدانی ژێرخان هەیە.
لەکۆتایشدا، هەردوولا جەختیان لەسەر بەردەوامی و خێراکردنی هەنگاوەکانی جێبەجێکردنی پڕۆژەکانی قۆناغی دووەم کردەوە، بە شێوازێک کە زۆرترین سوود بە ناوچە کەم دەرامەتەکانی سنووری پارێزگای هەولێر بگەیەنێت.
