پارێزگاری هەولێر، پێشوازى لە پارێزگاری سنە کرد
پارێزگاری هەولێر، پێشوازى لە پارێزگاری سنە کرد
ئەمڕۆ پێنجشەممە 2023.10.5، ئومێد خۆشناو، پارێزگاری هەولێر، لە دیوانى پارێزگا، پێشوازى لە زارعی کوشا، پارێزگاری سنە و شاندێکى یاوەرى کرد، کە پێکهاتبوون لە جێگری پارێزگار بۆ کاروباری ئابووری و نوێنەری وەزارەتی دەرەوەى کۆمارى ئیسلامى ئێران لە شاری سنە.
لە دیدارەکەدا، جەخت لە پتەوکردنی پەیوەندییەکانی نێوان هەردوو پارێزگا و بەهێزکردنی جموجۆڵی بازرگانی و ئابووری نێوان کۆماری ئیسلامی ئێران و هەرێمی کوردستان کرایەوە و گفتوگۆ لە بارەى دەرەنجامى ڕێککەوتنى نێوان پارێزگاى هەولێر و ئورمییە کرا، کە توانراوە لە ڕێگەى ئەو ڕیککەوتنامەیەوە زۆربەى کێشە و گرفتەکانى هەردوو مەرزى نێوان ئورمیە و هەولێر چارەسەربکرێت و بەهۆیەوە جوڵە و ڕه‌وشی بازرگانی لە دەروازەی سنووری نێودەوڵەتی حاجی ئۆمەران - تەمەرچین بەرەپێشچوونى زۆر بە خۆیەوە ببینێ، لەوبارەیەشەوە هەردوولا هاوڕابوون لەسەر واژووکردنى یاداشت و ڕێککەوتنێکى لەو چەشنەش لە نێوان هەولێر و سنە.
پاشان پارێزگارى سنە بە فەرمى بانگهێشتى پارێزگارى هەولێرى کرد بۆ سەردانیکردنى شارى سنە و لەلایەن خۆشیەوە پارێزگارى هەولێر بە سوپاسەوە بانگهێشتنامەکەى قەبوڵکرد و هەردوولاش نزیکبوونەوە و پەیوەندى نێوان زانکۆى سەڵاحەدین و زانکۆى کوردستانى شارى سنەیان بە پێویست زانى و جەختیان لە سوود وەرگرتن لە ئاڵوگۆڕى زانستى و تەندروستى بەگشتیى کردووە.
لە کۆتایدا پارێزگاری سنە، سوپاسى پارێزگارى هەولێرى کرد بۆ ئەو پێشوازییە گەرمەى لێیکرا و جەختى لەبەرە و پێشبردنی هەماهەنگی و هاوکاری نێوان پارێزگای هەولێر و پارێزگای سنە کردەوە و ئامادەیی هەموو هاوکاری و ئاسانکارییەکی بۆ بەهێزکردنی پەیوەندییەکان و جممجۆڵی بازرگانی لەنێوان هەردوو پارێزگا نیشاندا.
